புலிப்பாணி ஜோதிடம் 300 - பாடல் 147

கூறினேன் ஆறோனும் மலைக்கிரெண்டில் கொற்றவனே யெதிரியுட பொருளுஞ்சேரும் நீரேநி குடும்பாதி விழுந்துகெட்டால் நிலத்தில் நல்லகளவாளி வஞ்சகன் பொய்யான் ஆரே நீ தனபதியும் ஆறிலேற அப்பனே யெதிரிக்கி அவைபோல்செப்பு பாரேநி போகருட கடாட்சத்தாலே பண்பாக புலிப்பாணி பகர்ந்தேன்பாரே

மற்றொரு கருத்தையும் கூறுகிறேன் கேட்பாயாக! இலக்கினத்திற்கு ஆறுக்குடையவன் இரண்டில் இருப்பின் அச்சாதகனுக்கு எதிரியினுடைய பொருளும் தனமும் வெகுவாகச் சேரும். அதே சமயம் இரண்டாம் பாவாதிபதி கெடுவானாயின், அச்சாதகன் நல்ல களவாளியென்றும் வஞ்சகன் பொய்யன் என்பதையும் வகையாக உணர்ந்து கொள்க. அதேபோல் 2-க்குடையவன் ஆறாமிடத்தை அடைந்து நிற்க அச்சாதகனின் எதிரிக்கு மேற்குறித்த பலன்களைச் செப்புக என்று போகரின் அருளாணையால் புலிப்பாணி கூறினேன்.